افغان مشر او د پښتونخوا ملي عوامي ګوند رهبر محمود خان اڅکزي تیره اوونی په اسلام اباد کې د پاکستان د ټولو ګوندونو هغې غونډې ته چې د پاکستان د لومړي وزير په بلنه راغونډ شوي و د دې هېواد د پوځ او استخباراتو د مشرانو په وړاندې له ای ايس ای څخه وغوښتل چې په افغانستان کې مداخله ودروي او ورته یې وويل چې که د دې هېواد استخبارات (ای ايس ای) وغواړي په افغانستان کې په يوه مياشت کې دننه دننه امنيت راتلی شي ،دا غونډه له هغې وروسته راوبلل شوه چې امريکا په پاکستان په ښکاره ټکو تور ولګاوه چې استخبارات یې تروریزم د خپلو ګټو لپاره کاروي او د حقاني د ډلې سره چې په کابل کې د امريکا په سفارت او يو شمېر نورو بريدونو تورنه ده ملاتړ کوي. داسې ګونګوسې دي چې امريکا غواړي په وزيرستان کې د حقاني په پټنځايونو پخپله بریدونه وکړي ځکه چې ورته روښانه شوې ده چې پاکستان د حقاني شبکې ملاتړ کوي او نه غواړي چې له منځه یې یوسي،په غونډه کې د پاکستان د مسليم ليګ نواز ډلې مشر نواز شريف هم نيوکه وکړه او ویې ويل چې د دې معلومول په کار دي چې امريکا ولې په پاکستان دا ډول تورونه لګوي. نوموړي وويل چې په دالو کې څه تور شته په دې مانا چې هرومرو د استخباراتو او ترهګرو ډلو ترمنځ همکاري شته دی ،په دې غونډه کې د پاکستان له پنځوسو زياتو ګوندونو برخه اخيسته وه چې د پښتنو په استازيتوب په کې عوامي نيشنل ګوند چې په خيبر پښتونخوا ایالت حکومت کوي هم برخه اخيستې وه. عوامي نشنل ګوند په دې وروستۍ مساله کې د پاکستان د حکومت او پوځ دريځ غوره کړی دی او په داسې حال کې چې ډېری پاکستاني سياستوال د پآکستان او امريکا په اړيکو کې د تاوتريخوالي په اړه چوپ وو، دوی د پوځ د دريځ ملاتړ غوره کړ او په دې اړه یې د خيبر پښتونخوا له صوبايي اسامبلې څخه يو قراداد هم صادر کړ چې په کې د امريکا د دريځ غندنه شوې وه ،پښتنوخوا ملي عوامي ګوند تل په افغانستان کې د پاکستان مداخلې غندلي دي او د پاکستان له پوځه یې په دوامداره توګه غوښتي چې په افغانستان کې مداخلې ودروي. د دې ګوند ډېر شمېر غړو په فيس بوک په خپلو پاڼو د ګوند د اخريني دريځ او محمود خان اڅکزي د ويناو هر کلی کړی دی او ويلي یې دي چې د محمود خان د دې وینا سره همغږي دي چې :که د پاکستان آيي ایس آيي په افغانستان کې لاس وهنه بنده کړي زه ضمانت ورکوم چې په یوه میاشت کې دننه به افغانستان ته سوله او امن بیرته راستون شی ،په لندن کې د دې ګوند فعال غړی فايق خان يوسفزی وايي چې :که د آل پارټيز کانفرنس اعلامیه که داسې وای چې پنجاب به خپله بدماشي پریږدي او په نورو هیوادونو کې به لاس وهنه فورا بندوي، د نړﺉ ټول ترهګر به په يوه هفته کې د پښتنو سیمو نه ووځي او ځايي ترهګر به خپلې وسلې حکومت ته سپاري او د ترهګرۍ نه به توبه وباسی، دا کانفرنس پریکړه کوي چې افغانستان به د يو خپل واک او ازاد هېواد په توګه پيژني او که افغانستان هر چا سره دوستي کوي پنجاب به شيطاني نه کوي، د پاکستان په خارجه او داخله تګلاره/پالیسۍ جوړولو کې به له پښتنو، بلوچو، سندهیانو ، سراییکیانو څخه هم پوښتنه کیږي، د پنجاب فوج به په خارجه اد داخله پالیسۍ کې هيڅ رول نه لری او نه به په سیاست کې ګوتې وهي)) نو د دې غونډې پرېکړه به ورته د منلو وړوی،دنوموړی مطلب داګلیسی متن په لاندی ډول دی چی دښاغلی محمود خان له لوری ورسنیو ته وړاندی شوی دی.